«خلاص العمر بيعدي».. مسعد العقبي

خلاص العمر بيعدى
ومش فاضل فى قلبك شئ
سنين بتمر وتودى
وتدخل كل مرة فى ضيق
ودلوقتى
بتفهم كدبة اللمة
ووقت ما الوجع هدك
مفيش ضحكة ولا ضمة
سنينك
مجرد وقت من أيام
بتأكل م الرصيد أحلام
اصحى وقول للذكريات شكرا
وصدقنى…
مفيش أحباب
مفيش غير إن قلبك شاب
وداء الحلم كان صايبك
وبكرة تشوف
هتبدأ تقفل الابواب
وتستغنى بدون أسباب
هتتعلم تعيش راضى
وتقفل دفتر الماضى
هتضحك كل ما تفكر
فى حزن بكيته ع الفاضى
خلاص
مبقاش فى وقت يضيع
ولا باقى رصيد للبيع
كفاية اللى اتسرق منك
عشان ترضى عيون غيرك
عشت انت لكل الناس
لكن هم عاشوا لغيرك
سقيتهم م الفرح أطنان
ولا صانوا فى يوم خيرك
فصدقنى
مادام القرب كان خذلان
اكيد البعد …هيجيرك