مين اللي قال ..
البحر في عينيكي مجاش ؟
البحر لما يكون حياة ..
يبقى أكيد في عينيكي عاش
يا مودياني للمغيب في الظل ..
من فين أجيب الدوا للقلب لو موجوع ؟
مسموح أحبك أنا ..
ولا يكون ممنوع
عارف بإن الحب ليه قوانين
أولها لما يكون لغيرك عيب
يمكن يكون مكروه
من حقي اعيش معتوه ..
لما الزمان اختل
رغم ان أحلامي يا دوووب ..
لحقت طراطيف الأمل
متعلقة في حبل الغسيل
والحبل كان هالك
هتصدقي لما باقولهالك
شامم شياط الحب في العتمة
قلبي لغيري براح
ولقلبي انا,, كاتمة
ريحة سكوت الليل
مع البرق اللي طارح في السما ..
بتخوّف الأحلام
وتجمّع الكوابيس في عنقود المنام
عشمان أنام
عشمان الاقي الحب ..
خالي من التهديد
أو لما يجي بين قوسين
تعبان من الحب الجبان ..
واللي بعيد لبعيد
يا لعنة العشاق ..
حبك ,,دا بيت الداء
من بدري قالوا زمان القط ليه خناق
وانتي اللي حبك طوق ..
ملفوف على رقبتي
وانا لسة واقف ع الحدود ..
وباكسّر الوقت اللي متجمد بعود كبريت
واجتر حواديت الهوا
من أول العهد القديم ..
لنهاية العمر اللي فات
مشدود على شريط الوجع والذكريت
متحلي بالقلب الجريئ
وشجاعة الفرسان
راكب على حصاني الخشب
سيفي من الكرتون
خايف أبص لفوق ..
المستخبي يبان
يتشد عنقود الأماني الممكنة م الروح
يا حضنك المفتوح بطول النيل
وباتخدي بلأحضان محاسيبك
وانا اللى شيلتك طعم ف لساني
رغم اني دُقت المُر ..
حالف ماحاسيبك
يا رموشك المفرودة سجادة صلاة ..
للأوليا والعارفين
والعارفين انك مشاع
ممكن يكون الليل أمان ؟ّ
والحب يمشي في سكته من غير قوسين
وتخرجيه من غرفة الإنعاش
ويا هل ترى
إن عاش ؟؟
هالقى الإجابة للسؤال
مين اللي قال
البحر في عينيكي مجاش ؟ .
