أسماء جاد: حُب ساكِن بالإيجار

ليك حنان الدنيا والأيام وقلبى مش ناسيك

دا اللى زَيّك صعب إنه مَرّة أو يوم يِتنِسى

             صعب يرحل م القلوب

              *

ليك علامة ف كل موقف مَر بِيّا

سِبت جُوَّا القلب فاضى

لا اللى قرّب يوم قِدِر ياخُد مكانك

ولا السنين خليتنى اقول ان انتَ ماضى

              *

افترقنا ..

وكل سكة مشينا فيها

بيحكى جُوّاها التُرابْ

وينادينى البحر يهمسلى

وموجه يحن من كُتر الغياب

قالى فين اللى انتى كنتى

بترمى ويَّاه الحصَى

قلتله ان احنا افترقنا

بس كل اللى مابينَّا

عُمره ما ف يوم اتنسَى

         *

شوفت جُوّا الموجة ضِحكة

بتِبتِسملى من بعيد

وَيّا حُزن مالوش نهاية

وافتكرتك لما قولنا

عُمرنا ما هنفترِق

شوفت آدينا اهو افترقنا

والفراق كان البداية

        *

ليك معايا سنين جميلة شَايلهالك

حُب صافى معاه حَنين

اوعَى تنسانى ونادينى هكون فى بالك

وافتِكِرنى لو هواك وَدّاك لفين

            *

قولتهالك مش هقولها لحد غيرك

انت حبى وفرحى كله بشوفه فيك

لو فاكرنى يبقى كَتّر ألف خيرَك

واللى باقى ف عمرى كله هعيشُه ليك

            *

سيبنى جُوّا القلب ذكرَى

ماضى ممكن ييجى بُكرَا

حُب ساكن بالإيجار

ضِحكة حلوة ف يوم جميل

            *

وابقى زورنى لمّا اغمّض

عينى واحلم بيك وافَكّر

دا انت ساكن جُوّا قلبى

مش هدوَّر ع البديل

About The Author