سعــدون زعلان كده ليه
والحـــزن معلـــم فيـــه
بعــد ما كان متعلـــم
العمــه لبسها البيـــه
جاب شيشه وفتح الطاولهْ
راحــــت من أول جولة
قـــال هعمل بس محاولهْ
مـــا الشغل صبح ترفيه
ترفيه إجباري وجــــاي
وبأمــر إزاله م الحي
قال حجر البيت بالنـــي
ومهنـــدز هيسويــــه
ديّتها عشـــرة واجب
وبرفعة نص الحاجب
أقبض معلوم واتعاجب
والزهر كمان أرميــه
عد المطلوب بالذمة
والأستك ربطه بهمــه
جاتلوا الأموال العامة
واتهد البيت بمــا فيـه
اتلــم ولاد الحتـــــه
جمعوا في عياله الستة
وهدومه كلتها العتــه
معرفش البيت يبنيــه
واد ماشي مع التيــار
والبنت تــروح مشوار
والجد أهو تاه في هزار
مسئول الحي عايز توجيه
واتجدد حبسه ف جرسه
اتكلـــم طالب فرصـــه
زي المضروب في البورصة
والطماع متلومشي عليه
فـي الجلسة يا حول الله
سعــدون العاقل تــاه
شــاف بنته كمان ويـاه
كانت شاهده الحلوة عليه
بتقول للقاضـي أمانــة
يقعــد في الزنزانــة
علشان عــاره أذانــا
هندافع ونقــول إيــه
مش هدفع توكيل لمحامي
وخطيبي قال دا حرامي
وإن كان مظلوم قدامي
طب أخويا بيلعب إيه ؟!
علشان أمي مش بتبــوز
رفعت خلع وراح تتجوز
واتعلمنا أبجــد هـــوز
امشي حلال يتبارك فيه
رد محامي وكان متطوع
أمتى أبوكي كان بيكوع ؟
وليــه الأم كمان بتجوع
قالت محصلشي يا سي البيــه
طلب التأجيل لشهادة أم
والموال بقى عمي جنيه
بعد مداولة وشد وتيه
حكم القاضي بحكم نزيه
المجنون سعدون يكفيــه
فقد العيله عشان ترفيــه
رفع الجلسة ويــا إيديــه
