«عكس اتجاه».. قصيدة جديدة للشاعر الطبيب فكري ناصر

أنا البليغ اللي فجر وانتوا الجُناة

دستور خيال لكن جبل لو مين مَحاه

أهديكم المعنى الدفين.. لو تفهموه!!

إعراب جديد للمصطلح من غير نُحاة

وانا الأديب وبقولكم من غير أدب

كل السليم في شرعكم هو العطب

سيبويه غباءنا المبتكر صمّ و شطب

فرَّغ معاني الحلم دا من مبتغاه

قلت ارتوي بالصبر وارسم له الطريق

قلت احتمي بالحق وبحلمي الجريء

المعنى عايش ف استعارة موت بطيء

ودواه في إيدي من بدايته لمنتهاه

الحرف جر الإسم ف سنين الغياب

والجزم بالحق ابتدا بالِارتياب

شفت الحقايق طيف شقي. مجنون شباب

شفت اليقين ف إيمان وَفِي بْصُنع الإله

حتى الكناية ع الوجع كانت سراب

ومفيش بلاغة من خطأ يهدم صواب

علم البيان في عرفنا ملحد وتاب

وف عرفكم واقفين له ليه صفا ..انتباه

وادي “المضاف” على كل لون بيقول نعم

حتى “البدل” عن حلمنا سِكة لغم

فيها الوجود لون الضباب زي العدم

وكل ماالمنقذ يعود ياخدوه اشتباه

ودنك منين ياض ياجحا قال من” هناااك”

السكة سالكة بس ليه غاوي الهلاك

قلبي ف يوتوبيا بجناحات زي الملاك

شاعر بيرمي للمجاز طوق النجاة

وكأن شيئا لم يكن كسر اندمل

النثر طايح في الدروب عامل بطل

والشعر في كبد السما بدر اكتمل

نوَّر مدانا م السديم اللي شقاه

الوصف والموصوف غلط ضُمّوا ف إيديَّه

والجملة مش ف محلها ولا دي القضية

ليكم أداة المعرفة ونكرانها ليَّا

وطريق خلاص المعضلة عكس اتجاه

About The Author