«نشال أحاسيس».. مها السيد الخواجة

قرفانة بجد ومش طايقة
أتلفت والاقيه قدامي
من غيره النفس بقت رايقة
ورجعلي هدوءها من تاني

كان مالك روحي مكتفها
بحكاوي كتير بيألفها
من جهلي بصدق تستيفها
وبزيفه خدعني وعماني

صدقت دموعه السحاحة
شدني بهدوءه وبالراحة
فآمنته وعطيته مساحة
يملكني وعن ناسي نفاني

أسرتني وعوده وأوهامه
والكدب الملفوف في كلامه
ففتحت حدودي وعديته
أتاريه كان بيسلي ايامه

نشال أحاسيس لما آمنته
نفَّض جيب قلبي سرق راحته
سهاني وخد مني أماني
وصبحت اتنفس بإرادته

بقناع بيداري ألاعيبه
بصيت في مرايتي فبان عيبه
كشفتلي فنونه وملاعيبه
والنرجسي من روحي طردته